45 din post-stent, dil ghabraye toh kya normal hai? Tips chahiye!

Arre yaar, 45 din ho gaye stent angioplasty ko. Physically toh theek hu, walking bhi karta hu roz 30 min. Par mentally, kuch situations mein ghabrahat ho jaati hai. Kal hi office mein presentation ke baad thoda sa chakkar aisa laga, aur dil dhadakne laga. Doctor ne bola hai sab normal hai, ECG bhi clear aaya. Par phir bhi wo darr... pata nahi.

Family side se ek nayi tension hai. Meri wife ne ab ghar ka pura khana shift kar diya hai - low salt, no oil, sab boiled. Main samajhta hu wo mere liye kar rahi hai, par bachche (16 aur 19 ke) ab bahar khana kha rahe hain alag se. Ghar mein do alag khana ban raha hai, aur thoda awkward ho gaya hai. Unhe bhi samajh nahi aa raha ki papa ke saath kya khayen.

Ek cheez jo main try kar raha hu wo hai pranayama, subah subah 10 min. Doctor ne bola stress kam karna zaroori hai.

Mera sawaal hai - stent ke baad kitne dino/mahino mein aapko mentally comfortable feel hua? Wo pehla 2-3 mahina sabse tough hota hai kya? Koi tips ho toh zaroor share karna.